“Гэр хорооллын иргэдийн үерийг тэсвэрлэх чадавхыг бэхжүүлэх” төслийн хүрээнд Сүхбаатар болон Сонгинохайрхан дүүргийн зорилтот хороодын иргэдийн гамшгийн эрсдэлийг даван туулах чадавхыг нэмэгдүүлэх зорилгоор “Бэлэн бай” сургалт, мэдээлэл түгээх ажлыг 2026 оны 6–8 дугаар сард зохион байгууллаа.
Сургалт, мэдээлэл түгээх үйл ажиллагааг зорилтот хороодын хэсгийн ахлагч, сургагч багш, иргэдийн бүлгийн гишүүдийн оролцоотойгоор айл өрхүүдэд танхимын болон гэрээр хүргэх хэлбэрээр хэрэгжүүлсэн нь олон өрхийг хамруулах боломж бүрдүүлэв.
Сүхбаатар дүүргийн 16, 18, 20 дугаар хороонд нийт 1,973 өрхийн 6,131 иргэнд “Бэлэн бай” сургалт, мэдээллийг хүргэсэн бөгөөд уг ажилд 36 хэсгийн ахлагч болон иргэдийн бүлгийн гишүүд, эко байцаагч, нийгмийн ажилтан хамтран ажиллажээ.
Сонгинохайрхан дүүргийн 4, 5, 26, 27 дугаар хороонд 41 хэсгийн ахлагч ажиллаж, нийт 2,085 өрхийн 8,002 иргэнд гамшгийн эрсдэлээс урьдчилан сэргийлэх сургалт, мэдээллийг хүргэсэн байна.
Ингэснээр хоёр дүүргийн долоон хорооны нийт 4,058 өрхийн 14,133 иргэнд гамшгийн эрсдэлийг бууруулах мэдлэг, мэдээлэл хүргэлээ.
Өрх бүр гамшигт бэлэн байх мэдлэг, дадлыг түгээв
“Бэлэн бай” сургалтыг Онцгой байдлын ерөнхий газрын сургалтын агуулга, стандартын дагуу таван үндсэн чиглэлээр хүргэсэн. Үүнд уур амьсгалын өөрчлөлт ба дасан зохицох, үер ус болон гал түймрийн аюулаас сэргийлэх, газар хөдлөлт ба аянга цахилгаанаас урьдчилан сэргийлэх, өрхийн гамшгийн эрсдэлийг үнэлж бэлэн байдлын төлөвлөгөө боловсруулах, ахуйн химийн бодисын аюулгүй байдлын сэдвүүд багтжээ. Өрхүүдэд сургалтын гарын авлага, мэдээллийн материалыг хүргэж, агуулгыг тайлбарлан таниулсан байна.
Сургалтын нэг онцлог нь иргэдэд зөвхөн мэдээлэл өгөхөөс гадна өөрийн өрхийн гамшгийн эрсдэлийг үнэлж, түүнд тохирсон бэлэн байдлын төлөвлөгөө боловсруулахад чиглэсэн явдал байлаа. Иргэд ялангуяа өрхийн эрсдэлийг үнэлэх, бэлэн байдлын төлөвлөгөөг хамтран боловсруулах үйл ажиллагаанд идэвхтэй оролцож, өндөр ач холбогдол өгсөн байна.
Тайлангийн хавсралтад буй сургалтын явцын гэрэл зургуудаас харахад мэдээллийг зөвхөн танхимд бус, айл өрхийн гэрт болон хорооны нийтийн орчинд иргэдтэй нүүр тулан ажиллах хэлбэрээр хүргэсэн байна.
Хэсгийн ахлагчид мэдлэгийг өрх бүрд хүргэх гүүр боллоо
Энэхүү үйл ажиллагаанд хороодын хэсгийн ахлагчдыг түшиглэн ажилласан нь “Бэлэн бай” сургалтын мэдээллийг гэр хорооллын айл өрхүүдэд шууд хүргэхэд чухал үүрэг гүйцэтгэв. Хэсгийн ахлагч, сургагч багш нар иргэдтэй уулзаж, гамшгийн эрсдэлийг таних, үер ус болон бусад гэнэтийн гамшгаас урьдчилан сэргийлэх, гамшгийн үед авах анхан шатны арга хэмжээний талаар мэдээлэл, зөвлөмж хүргэлээ.
Үүний үр дүнд зорилтот хороодын иргэдийн үер, ус болон бусад гамшгийн эрсдэлээс урьдчилан сэргийлэх мэдлэг нэмэгдэж, өрхийн түвшинд бэлэн байдлаа хангах, гамшгийн үед авах анхан шатны арга хэмжээний талаарх чадавх бэхжсэн байна.
“Гэр хорооллын иргэдийн үерийг тэсвэрлэх чадавхыг бэхжүүлэх” төсөл нь ийнхүү иргэд, хэсгийн ахлагч, орон нутгийн оролцогч талуудын хамтын ажиллагаанд тулгуурлан гамшгийн эрсдэлийг бууруулах мэдлэг, дадлыг өрхийн түвшинд хүргэж, гэр хорооллын иргэдийн бэлэн байдал, даван туулах чадавхыг бэхжүүлэхэд чиглэн ажиллаж байна.
